தமிழர்களுக்கே தெரியாத ஆனால் உலகறிந்த ஒரு தமிழனை பற்றி ஒரு படம். தமிழ் தமிழ் என்று அடித்துக்கொள்ளும் அரசியல்வாதிகளுக்கேனும் தெரிந்திருக்குமோ என்னவோ ! இந்த முயற்சிக்காகவே முருகதாசுக்கு நன்றியை தெரிவிக்கலாம்.
படம் வெளிவந்து பல நாட்கள் கழித்து சென்றதால் அலைமோதும் கூட்டம், ரசிகர் மன்ற விசில்கள் என்று எவ்வித தொல்லையும் இன்றி நிம்மதியாக பார்க்க முடிந்தது
போதிதர்மனைப் பற்றிய முதல் சில நிமிடங்கள் நிச்சயம் பிரம்மிப்பை ஏற்படுத்துகிறது. இப்படியும் ஒரு மனிதனா என்று நாம் நினைத்துக்கொண்டிருக்கும் பொழுதே படம் சென்னைக்கு பயணிக்க... ஆரம்பமாகிறது மசாலா
இவ்வளவு பெரிய முயற்சியை கையில் எடுத்தும் தமிழ் ரசிகர்களின் மேல் நம்பிக்கை இல்லாமல் தேவையற்ற இடங்களில் பாடல்களை திணித்து இருப்பது சற்றே நெருடலாக இருக்கின்றது
அதிலும் முருகதாஸின் மிகப்பெரிய தவறுகளில் ஒன்று கமலின் மகளான ஸ்ருதியை நாயகியக்கியது.. கமல் பெண் என்பதாலோ என்னமோ பாடல் காட்சிகளில் சூர்யாவிடம் எப்போதும் இருக்கும் துள்ளல் இல்லை.. முகத்தில் காதல் பார்வை என்பதற்கான அடையாளமே இல்லை!
ஹாரிஸ் ஜெயராஜின் பாடல்கள் மிகவும் சுமாராக இருப்பது ஒரு புறம் இருக்க பாடல்களை படமாக்கியிருக்கும் விதம் அதைவிட சுமார் ரகம்.. அதிக இடங்களில் "ஸ்லோ மோஷன்" நடனங்கள் இதற்கு சாட்சி!
தமிழை பற்றி பெருமையாக பேசவேண்டிய இடத்தில் ஸ்ருதியின் உச்சரிப்பு சற்றே சிரிக்கவைக்கின்றது!
பீட்டர் ஹெய்னின் வழக்கமான நூறு பேரை அடிப்பது போன்ற சண்டை காட்சிகள் இல்லாதது மனதுக்கு இதமான விஷயங்களில் ஒன்று.. வில்லனின் பார்வையில் ஒவ்வொரு வண்டியாக சீறிப்பாய்ந்து அடிக்கும் காட்சி சற்றே நீளமாக இருப்பது போல் தோன்றுகிறது. எல்லா படங்களும் எந்திரன் ஆகா முடியாது.. எல்லா ஹீரோக்களும் சூப்பர்ஸ்டார் ஆகா முடியாதல்லவா!
அண்டை நாட்டின் மூலம் இப்படி ஒரு ஆபத்து இருக்கும்பொழுது அதை கல்லூரி மாணவர்கள் அரசிடம் தெரியப்படுத்தாமல் தனித்து செயல்படுவது ஏதோ நாட்டில் அனைத்து அதிகாரிகளும் கெட்டவர்கள் என்று சித்தரிக்கும் விதத்தில் உள்ளது. அதுவும் போலீஸ் ஸ்டேஷனில் புகுந்து அழித்துவிட்டு 12 நாட்கள் வில்லன் வெளியே திரிவது அபத்தமாக உள்ளது!
இருப்பினும்... சூர்யா.. கிடைத்த இடங்களில் ஜொலிக்கின்றார்.. அதுவே இந்தப் படத்திற்கு மிகப்பெரிய பலம்
ஏழாம் அறிவு ஒரு தமிழனின் அறிவு என்ற செய்தி மிகவும் முக்கியமான ஒன்று..
No comments:
Post a Comment